Lajmet

Vushtrri, 21 janar 2015 - Akademinë e Kosovës për Siguri Publike, sot e vizitoi një delegacion nga Këshilli i Evropës (KE), i udhëhequr nga  Andrew Forde, u.d. Shef i Zyrës së Këshillit të Evropës në Prishtinë. 

Delegacioni u prit nga Drejtori i Përgjithshëm Ismail Smakiqi dhe menagjmenti i lartë i Akademisë. Gjatë këtij takimi Smakiqi e informoi delegacionin me prioritetet, të arriturat, trajnimet dhe proceset e fundit të Akademisë, e në theks të veçantë hapja e Fakultetit ti Sigurisë Publike.

Gjatë takimit mes drejtorit Smakiqi dhe u.d. Shef i Zyrës së Këshillit të Evropës në Prishtinë Andrew Forde  u diskutua për bashkëpunimin mes Akademisë dhe organizatave ndërkombëtare këtë rast Këshillit të Evropës, si dhe u diskutua dhe u shpalos projekti i ri  qe ka te bëjë me rregullat e burgjeve sipas standardeve evropiane.

U.d. Shef i Zyrës së Këshillit të Evropës në Prishtinë Andrew Forde, shprehu gatishmërinë e tij për fuqizimin e mëtutjeshëm të bashkëpunimit ndërmjet Këshillit të Evropës dhe Akademisë. Në takim u diskutua edhe për projekte të reja, sidomos në fushën e sigurisë .

Gjithashtu ai shprehu gatishmërinë që ta ndihmoj Akademinë edhe me ekspert të fushave të sigurisë në interes  të ngritjes dhe kapaciteteve trajnuese për pjesëtaret e sigurisë.

Në fund të takimi drejtori Smakiqi e falënderoi u.d. Shef i Zyrës së Këshillit të Evropës në Prishtinë Andrew Forde për gatishmërinë e treguar në bashkëpunimin e mëtutjeshëm. 

Vushtrri, 16 janar 2015 - Gjatë vitit  2014 Akademia e Kosovës për Siguri Publike  (AKSP), ka shënuar mjaftë të arritura, dhe me sukses ka përmbush objektivat strategjike të parapara për vitin 2014. Si rezultat i përmbylljes më sukses të projektit të binjakëzimit, për herë të parë në Kosovë është hapur Fakulteti i Sigurisë Publike. Gjatë vitit që e lamë pas në Akademi janë zhvilluar 326 tranime  dhe janë trajnuar  5627 pjesëtarë të sigurisë publike.

Si të arritura me rezultate konkrete për periudhën raportuese janë:

Përmbyllja me sukses e Projektit të Binjakëzimit - Projekti dy vjeçar i binjakëzimit i financuar nga Komisioni Evropian “Përmirësimi i Arsimit në Sektorët e Rendit dhe Sigurisë Publike”, duke përmbushur të gjitha rezultatet detyrimore në përgatitjen e AKSP-së në ofrimin e arsimit të lartë.

Akreditimi –Agjencia e Kosovës për Akreditim (AKA) bazuar në vendimin e  Këshillit Shtetëror të Cilësisë me datë 01.07.2014 ka marr vendim për akreditimin e programit studimor Bachelor për Siguri Publike (240 ECTS)

Fakulteti i Sigurisë Publike - në kuadër të AKSP-së është hapur edhe Fakulteti i Sigurisë Publike i cili ofron arsim të lartë për zyrtarët  e Agjencioneve të Sigurisë Publike ku nga data 15 Tetor 2014 ka filluar viti i  parë  akademik 2014/15 me gjithsej 69 student.

Aprovimi i Standardeve të Profesionit në Sektorin e Sigurisë Publike – Gjatë vitit 2014 për herë të parë Këshillit Drejtues i Autoritetit Kombëtar i Kualifikimit ka aprovuar standardet e profesionit për sektorin e sigurisë publike për agjencionet që veprojnë në kuadër të AKSP-së si: Zyrtar i ri Policor, Zyrtar Korrektues, Zyrtar Doganor, Zjarrfikës dhe Zyrtar Sprovues.

Trajnimet – AKSP në kuadër të përgjegjësive për ofrimin e trajnimeve për institucionet e sigurisë publike ka organizuar gjithsej 326 trajnime me 5627 vijues të trajnimeve.

Në kuadër te organizimit të këtyre trajnimeve ka pasur bashkëpunime të shumta edhe me partnerët ndërkombëtarë si: ICITAP, OSBE, BE, EULEX, ambasadën Amerikane, Franceze dhe Policin e Turqisë duke angazhuar ekspertë dhe ligjërues nga lëmit të ndryshme me interes të përfitimit të njohurive.

Në AKSP me përkrahjën e ICITAP-it është organizuar edhe trajnimi me karakter regjional me pjesëmarrës nga vendet e rajonit si: Shqipëria, Kroacia, Bosnja e Hercegovina dhe Maqedonia i titulluar Shkolla e Komandës dhe Stafit Policor dhe ka zgjatur 10-javë me ligjërues profesorë nga Universiteti NorthëWestern të SHBA-ve.

Bashkëpunimi Ndërkombëtar – ne fushën e bashkëpunimit ndërkombëtar AKSP-ja ka avancuar ne bashkëpunime duke zhvilluar aktivitetet dhe takime të rëndësishme nga fusha e sigurisë publike; Nënshkrimi i  memorandum të mirëkuptimit me Akademinë Policore të Shqipërisë (APSH), Fillimi i negociatave për nënshkrimin e një “Marrëveshje Pune “ me Institucionin e CEPOL-it; si dhe duke qene pjesëmarrëse ne disa ngjarje dhe konferenca si: Konferencën e tretë të INTERPA-s e mbajtur në Kuala Lumpur, Malajzia
Punëtoria mbi Standardet për të drejtat e njeriut për trajnimin e zyrtarëve të zbatimin të ligjit e organizuar nga TAIEX-it e mbajtur në Bruksel të Belgjikës
,, Java ndërkombëtare” e organizuar nga Akademia e Shkencave të Sigurisë në Estoni

Vizit Universitetit të Policisë Gjermane në Muenster të Gjermanisë.

Akademia poashtu është vizititar nga 20 delegacione të niveleve të ndryshme nga vendet e huaja.

Ndërtimi i Konviktit – me qellim te krijimit te një infrastrukture moderne për realizimin e mandatit te saj, gjate viti 2014 AKSP-ja ka realizuar edhe projektin kapital për ndërtimin e konviktit të nivelit të lartë me një sipërfaqe prej 3800 m2 duke përfshirë edhe salla leximi, kabinete dhe shume elemente tjera përcjellëse.

Vushtrri, 16 janar – Drejtori i Akademisë së Kosovës për Siguri Publike (AKSP), Ismail Smakiqi,  priti sot në takim një delegacion nga Byro për Çështje Ndërkombëtare të Narkotikëve dhe Zbatim të Ligjit, Zyra për Evropë dhe Azi të udhëhequr nga Kate Mc Farland. Po ashtu delegacioni ishte i shoqëruar edhe nga zyrtaret e  ICITAP-it  në Kosovë.

Qëllimi i vizitës së këtij delegacioni në Akademi ishte që të njihen më për se afërmi me zhvillimet, aktivitetet, trajnimet dhe procesin nëpër të cilin po kalon Akademia.

Drejtori Smakiqi fillimisht e falënderoi delegacionin për vizitën duke e njoftuar atë për procesin nëpër të cilin ka kaluar Akademia deri në hapjen e Fakultetit të Sigurisë Publike, si dhe për funksionalizimin e tij. Po ashtu delegacioni u njoftua edhe për trajnimet që mbahen në Akademi ku marrin pjesë të gjitha agjencionet e sigurisë publike. Më këtë rast drejtori Smakiqi u shpreh i gatshëm për bashkëpunim. Ai falënderoi ambasadën amerikane konkretisht ICITAP-in për ndihmën dhe përkrahjen që po i japin Akademisë.

‘’Akademia e Kosovës për Siguri Publike në Vushtrri ka marr karakter regjional dhe me gjerë me ofrimin e trajnimeve jo vetëm për pjesëtaret e sigurisë publike në vend por edhe  për vendet e Ballkanit’’, tha menaxheri i Programit ICITAP për Kosovë Camerun Fisher. 

Po ashtu delegacioni nga Byro për Çështje Ndërkombëtare të Narkotikëve dhe Zbatim të Ligjit, Zyra për Evropë dhe Azi e inkurajuan drejtorin Smakiqi për të arriturat. Po ashtu ata shprehen gatishmërinë e tyre për bashkëpunim dhe përkrahje edhe në të ardhmen.

Vushtrri, 22 dhjetor 2014 - Lidhur me lajmin e publikuar në disa portale në Kosovë, ku ndër të tjera thuhet se, Prof. dr. Enver Hasani, kryetar i Gjykatës Kushtetuese të Republikës së Kosovës, punon si mësimdhënës në Akademinë e Kosovës për Siguri Publike (AKSP),  dëshirojmë t’ju informojmë se: “AKSP ka qenë e nderuar kur më 7 shkurt të vitit 2014, kryetari i Gjykatës Kushtetuese të Republikës së Kosovës, Prof. dr. Enver Hasani, ka nënshkruar kontratën për punë vullnetare të ofruar nga  AKSP, për mësimdhënie të lëndës: ‘E Drejta Kushtetuese’’’. 

Neni 6, pika 2 e kontratës, thotë se mësimdhënësi, Prof. dr. Enver Hasani, “angazhohet në mënyrë vullnetare, andaj punëdhënësi nuk ka obligim financiar ndaj mësimdhënësit sipas kushteve të kësaj kontrate”.

AKSP në vazhdimësi kultivon ndjenjën e falënderimit të thellë për kontributin e çmueshëm që kryetari Hasani po e jep në këtë institucion të arsimit të lartë në Kosovë, marrë parasysh faktin se ky është viti i parë i funksionimit të Fakultetit të Sigurisë Publike në Akademi. 

Dëshira e profesorit Hasani, që të mbajë ligjërata në mënyrë vullnetare dhe pa pagesë për studentët e Akademisë, të cilët vijnë nga agjencitë e zbatimit të ligjit, është inkurajim për Akademinë, studentët dhe mësimdhënësit e Fakultetit të Sigurisë Publike.

Vushtrri, 18 dhjetor 2014 - Në Akademinë e Kosovës për Siguri Publike sot kadetët e gjeneratës së 52-të të Policisë së Kosovës u rreshtuan para Bordit të Akademisë njëherit edhe drejtorit të Përgjithshëm të Policisë së Kosovës Shpend Maxhuni i cili gjithashtu është edhe udhëheqës i këtij bordi.

Me këtë rast Maxhuni mbajti një fjalim  i cili ju drejtua kadetëve duke çmuar vendosmërinë e tyre për të qenë pjesë e Policisë së Kosovës.

‘’Profesioni i policit ngërthen ne vete një kompleksitet që ndërlidhët më shumë elemente, dhe këto elemente mund ti mësoni gjatë trajnimit bazike. Profesioni i policit në asnjë rrethanë nuk duhet kuptuar si privilegj, por si përgjegjësi  dhe obligim për ruajtjen e rëndit dhe sigurisë në vend dhe për këtë gjatë trajnimit bazik ju duhet ti jepni prioritet ngritjes së juaj profesionale’’, tha Maxhuni.

Gjithashtu ai inkurajoi kadetët që maksimalisht të angazhohen në nxënien e njohurive që do të ju shërbejnë në  punën e tyre.

‘’Ndihuni krenar për vendimin që keni marrë për ti shërbyer qytetarëve të Republikës së Kosovës’’, tha Maxhuni.
 

Vushtrri, 09 dhjetor 2014 -  Me ftesë të Universitetit Policor Gjerman  në  Munster, drejtori i Përgjithshëm  i  Akademisë së Kosovës për Siguri Publike (AKSP) Ismail Smakiqi, i shoqëruar nga dekani i Fakultetit të Sigurisë  Publike Nazmi Iballi, ka udhëtuar zyrtarisht  për  në  Gjermani.  Qëllimi i vizitës është shkëmbimi i përvojave dhe krijimi i mundësive për bashkëpunim mes Akademisë së Kosovës për Siguri Publike dhe Universitetit Policor  në Munster të Gjermanisë. Kjo vizitë e cila është projekt i Organizatës  për Siguri dhe Bashkëpunim në Evropë (OSBE), ka për qellim përkrahjen e Akademisë në themelimin e programeve të avancuara të arsimit. 

Në kuadër të këtij programi temat që do të diskutohen gjatë kësaj vizite janë; Trajnimi në përbërjen dhe veprimtarinë e Universitetit Policor Gjerman, parimet ligjore dhe organizimi, kursi modular i masterit, struktura dhe përzgjedhja e mësimdhënësve. Po ashtu çështjet që do të diskutohen janë edhe; Akreditimi dhe ndërlidhëshmëria me procesin e Bolonjes (Sistemi evropian i transferit të kredive), menaxhimi i cilësisë, trajnimi në arsimin e lartë etj. 

Vushtrri, 01 dhjetor 2014 –Në Akademinë e Kosovës për Siguri Publike (AKSP), sot filloi trajnimi bazik i gjeneratës së 52 të  Policisë së Kosovës. Kadetët e rinj do të trajnohen sipas plan programeve të dizajnuara në bazë të standardëve ndërkombëtare për të drejtat e njeriut dhe sundim të ligjit.  Drejtori i Akademisë së Kosovës për Siguri Publike, Ismail Smakiqi i përshëndeti kadetë dhe iu dëshiroj suksese gjatë trajnimit të tyre për Policë të Kosovës. Smakiqi i inkurajoi kadetët që të japin maksimumin nga vetja e tyre dhe të gjithë trajnimin bazik ta përfundojnë me sukses. 

Po ashtu edhe përfaqësuesi i Policisë së Kosovës në Akademi, nënkolonel Driton Zabërxha i përshëndeti dhe iu uroi suksese kadetëve.  

Trajnimi do të zgjasë 26 javë dhe do të marrin pjesë 147 kadet, prej tyre janë 16 femra, 26 serb, 6 boshnjak, 2 rom dhe 3 egjiptian. 

Tiranë 26 nënt04 2014 - Më datë 26.11.2014, në Tiranë u bë nënshkrimi i Marrëveshjes së Bashkëpunimit ndërmjet Akademisë së Kosovës për Siguri Publike (AKSP) dhe Akademisë Policore të Shqipërisë (APSH). Marrëveshjen u nënshkrua nga drejtorët e dy akademive,  Ismail Smakiqi, Drejtor i Përgjithshëm i Akademisë së Kosovës për Siguri Publike (AKSP) dhe Bilbil Mema, Drejtor i Përgjithshëm i Akademisë Policore të Shqipërisë (APSH). 

Qëllimi i kësaj marrëveshje është përcaktimi i bashkëpunimit reciprok në mes të dy Institucioneve për të përkrahur objektivat strategjike në fushat e trajnimit, studimit, hulumtimit, zhvillimit si dhe në marrëdhëniet me publikun.

Fushë veprimtaria e bashkëpunimit ndërmjet Institucioneve përfshinë;

zhvillimin dhe bashkërendimin e arsimit në tri nivele, arsimin profesional, arsimin e vazhdueshëm profesional dhe arsimin e lartë. Lidhjet e hulumtimit, shkëmbimin e informatave dhe rezultateve, vizitat e personelit hulumtues dhe ofertat për financim të hulumtimit nga Bashkimi Evropian dhe agjencitë tjera ndërkombëtare në fushat e policimit, sigurisë së brendshme dhe zbatimit të ligjit. Shkëmbimin dhe vizitat e personelit për këshilla dhe bashkërendim të standardeve, kurseve dhe zhvillim të kurrikulës dhe çështje të tjera arsimore dhe pedagogjike. Përkrahjen e mentorimit, këshillimit dhe trajnimit për personelin akademik, profesional dhe administrativ. Këmbimin e programeve të trajnimeve dhe programeve studimore në fushën e Sigurisë Publike.

Pas nënshkrimit të marrëveshjes së bashkëpunimit, Akademia e Kosovës për Siguri Publike dhe Policia e Republikës së Kosovës i dorëzojnë Akademisë Policore te Republikës së Shqipërisë dy kurset e trajnimit; Trajnimi themelor për policë  dhe Menaxhimi i vijës së parë.  Dorëzim- pranimin e këtyre materialeve e nënshkruan përveç dy drejtorëve të akademive edhe nënkoloneli Agron Rukiqi – drejtor i burimeve njerëzore në Policinë e Kosovës. Po ashtu Akademia e Kosovës për Siguri Publike  i dorëzoi Akademisë Policore të Republikës së Shqipërisë “Programin Studimor Bachelor në Sigurinë Publike” si dhe 18 dokumente tjera të më të rëndësishme të AKSP.

Në vazhdim të kësaj ceremonie para personelit të Akademisë Policore të Shqipërisë  si dhe oficerëve të lart të policisë së shtetit,  drejtori Rukiqi prezantoi  kurset e trajnimit; Trajnimi themelor për policë dhe Menaxhimi i vijës së parë.  Ndërsa   dekani i Fakultetit të Sigurisë Publike në Akademinë e Kosovës për Siguri Publike, Nazmi Iballi prezantoi, Programin Studimor Bachelor në Sigurinë Publike. 

Kurse drejtori Bilbil Mema shprehi kënaqësinë për nënshkrimin e marrëveshjes së 

bashkëpunimit ndërmjet Akademisë së Kosovës dhe Akademisë  Policore të Shqipërisë. Mema tha se kjo i mundëson dy akademive bashkëpunimin institucional me interes tepër të madh për të dyja vend. Zoti Mema me këtë rast falënderoi  Akademia e Kosovës për Siguri Publike dhe Policia e Republikës së Kosovës për ofrimin e dy kurset e trajnimit; Trajnimi themelor për policë dhe Menaxhimi i vijës së parë  si dhe Programin Studimor Bachelor në Sigurinë Publike.

Drejtori Smakiqi, Nënkolonel Rukiqi dhe Dekani Iballi e falënderuan  drejtorin Mema për pritjen në Akademi dhe vlerësuan tepër lart ofrimin e kurseve të trajnimit dhe programeve studimore të institucioneve të Kosovës, në vazhdën e bashkëpunimit të institucioneve të sigurisë publike të dyja shteteve.

Vushtrri, 25 nëntor 2014 - Sot në Akademinë e Kosovës për Siguri Publike qendra e Gjenevës për Kontroll Demokratikë të Forcave të Armatosura (DCAF), dhuroi donacion të librave.

Drejtori Smakiqi vlerësoi lartë këtë donacion të librave nga DCAF dhe tha kjo ndikon në ngritjen e nivelit të arsimit dhe dijës së zyrtarëve të Agjencioneve të Sigurisë Publike. 

Gjithashtu ai theksoi se biblioteka e Akademisë çdo ditë e më shumë po pasurohet me tituj të ri të librave,  në një fazë të zhvillimeve pozitive, tani edhe me hapjen e Fakultetit të Sigurisë Publike, e që është mjaftë më rëndësi për çdo pjesëmarrës në këtë institucion arsimor.

Donacioni përmbante libra që kryesisht mbulojnë sferën e sigurisë.

Pas një trajnimi dhjet javor në Akademinë e Kosovës për Siguri Publike, përfundoi trajnimi Shkolla e Stafit Policor dhe Komandës. 

Në ceremoninë e diplomimit morën pjesë, zëvendës ambasadorja Jennifer Bachus, ministri i Punëve të Brendshme Bajram Rexhepi, drejtori i Përgjithshëm i AKSP-së Ismail Smakiqi, zëvendësdrejtori i Policisë së Kosovës Naim Rexha, drejtori i Qendrës për Siguri Publike i Universitetit Northwestern David Bradford, menaxheri i Programit ICITAP për Kosovë Camerun Fisher  si dhe përfaqësues të Universitetit “Northwestern”.

Në këtë trajnim kanë marr pjesë 40 udhëheqës të lartë të policisë nga vendet e rajonit nga Kosova Shqipërisë, Bosnja dhe Hercegovina, Kroacia,  Maqedonia dhe Mali i Zi.

Nga të pranishmit ky trajnim u vlerësua lartë në ngritjen e nivelit profesional dhe përfitimit të njohurive të shkëlqyera nga fusha e sigurisë publike. Ky trajnim është organizuar nga ICITAP-i, ndërsa ligjërues në këtë trajnim ishin profesor nga Universiteti Northwestern.

Akademia edhe kësaj here ka qen nikoqire e mbajtjes së trajnimit Shkolla e Stafit Policor dhe Komandës.

Vushtrri, 22 tetor 2014 – Në Fakultetin e Sigurisë Publike i cili është në kuadër të Akademisë së Kosovës për Siguri Publike (AKSP)  filluan ligjëratat në programin bachellor për 69 studentët, pjesëtarë të institucioneve të sigurisë publike. 

Sot para studentëve mbajti ligjërata kryetari i Gjykatës Kushtetuese të Republikës së Kosovës,  prof.dr. Enver Hasani.

Me këtë rast Hasani u shprehë se ndjehet i lumtur  qw të kontribuoj në arsimimin e të punësuarve në institucionet e sigurisë, në përgjithësi rendit dhe ligjit në Republikën e Kosovës.

Përveç personelit të rregullt akademik prej tetë mësimdhënësve, Akademia ka angazhuar edhe një numër të mësimdhënësve nga Universiteti i Prishtinës si dhe ekspert në fushën e sigurisë 

Ky program i studimeve bachellor është mjaft me rëndësi sepse Akademia është i vetmi institucion kombëtarë trajnues dhe arsimor i gjashtë institucioneve të sigurisë publike. Programin studimor në nivelin bachellor të Fakultetit të Sigurisë Publike e bënë programin unikat në regjion dhe me gjerë.

Fakulteti i Sigurisë Publike filloi vitin e parë akademikë  2014/2015 më 15 tetor 2014, ku do ti ndjekin studimet 69 pjesëtarë të sigurisë publike në programin studimor Bachellor në fushën e sigurisë.

Vushtrri, 15 tetor 2014 – Në Fakultetin e Sigurisë Publike sot fillojë viti i parë akademikë  për vitin 2014/2015  ku do ti ndjekin studimet 69 pjesëtarë të sigurisë publike në programin studimor Bachellor në fushën e sigurisë. Fakulteti i Sigurisë Publike i cili është në  kuadër të Akademisë së Kosovës për Siguri Publike është i akredituar nga Agjencia e Akreditimit. 

Në ceremoninë e hapjes së këtij fakulteti morën pjesë: zëvendësministri i Punëve të Brendshme, Izmi Zeka, drejtori i përgjithshëm i Policisë së Kosovës, Shpend Maxhuni,  ud/i Kryeprokurorit të Shtetit, Sylë Hoxha, drejtori i Akademis, Ismail Smakiqi, drejtues të Agjencive të Sigurisë Publike, si dhe përfaqësues të institucioneve vendore dhe ndërkombëtare. 

Zëvendësministri i Punëve të Brendshme, Izmi Zeka tha se Akademia e Kosovës për Siguri Publike, ka dhënë kontribut të jashtëzakonshëm në ngritjen e kapaciteteve, fillimisht të Policisë së Kosovës, pastaj Doganës, Shërbimit Korrektues, Menaxhimit të Emergjencave, Shërbimit Sprovues dhe Inspektoratit Policor.

“Ministria e Punëve të Brendshme ka vlerësuar lartë punën e Akademisë e cila në përkrahje të Zyrës së Bashkimit Evropian në Kosovë dhe pas një angazhimi të jashtëzakonshëm po hapet  Fakulteti i  Sigurisë Publike, përkatësisht fillimi i funksionimit të programit studimor katërvjeçar Bachelor, në sigurinë publike, i dizajnuar në pajtueshmëri me sistemin e Bolonjës për arsimin e lartë”, tha Zeka. 

Ndërsa drejtori i Përgjithshëm i Policisë së Kosovës, Shpend Maxhuni, ka përgëzuar Akademinë për një arritje kaq të rëndësishme, siç është hapja e Fakulteti të Sigurisë Publike. 

“Hapja e këtij Fakulteti është bërë me qëllim të avancimit të punës profesionale në të mirë të të gjithë qytetarëve të Kosovës. Hapja e këtij fakulteti është një etapë e re me qëllim të avancimit profesional, i cili do të ndikojë në mënyrë pozitive në punën e pjesëtarëve të sigurisë publike”, u shpreh Maxhuni.

Drejtori i Përgjithshëm i Akademisë së Kosovës për Siguri Publike, Ismail Smakiqi e quajti moment historik hapjen e Fakultetit të Sigurisë Publike. 

“Akademia që  nga sot fillon në praktik funksionalizimin e nenit 2, pika 1 të Ligjit për Akademinë e Kosovës për Siguri Publike, i cili Akademinë e bënë institucion përgjegjës për ofrimin e trajnimit dhe arsimit të lartë, si dhe zhvillimin e kapacitete në fushën e sigurisë publike”, tha Smakiqi. 

Drejtori i AKSP-së Ismail Smakiqi, theksoi se Akademia është i vetmi institucion kombëtar i trajnimit dhe arsimimit, ku më shumë se 12 mijë të punësuar në agjenci të sigurisë publike kanë përfunduar trajnimin bazik në Akademinë e Kosovës për Siguri Publike. 

Ai tha se gjatë 15 vjetëve në Akademi janë shënuar mjaftë të arritura ku tash më hapjen e fakulteti po shënohet një e arritur  e madhe. Gjatë fjalimit drejtori Smakiqi ka përmendur disa faktet  të rëndësishme për Akademinë;

“Për çdo vit së paku 5000 vijues kryejnë trajnime të specializuara dhe të avancuara, së paku 20% e këtyre trajnimeve vazhdojnë të përkrahen nga instruktor ndërkombëtar, akademia çdo vit është duke dëshmuar se dëshiron të jetë ‘Qendër e eksilencës’ për trajnimin e oficerëve të lartë të zbatimit të ligjit, është përfshirë në të gjitha asociacionet e akademive dhe kolegjeve të zbatimit të ligjit në Evropë, Shtetet e Bashkuara të Amerikës, bashkëpunon ngushtë me komunitetin, në përputhje me vizionin e saj, me qëllim të ruajtjes së paqes dhe ngritjes të sigurisë të qytetarit”, tha Smakiqi duke falënderuar të gjitha Institucionet vendore dhe ndërkombëtare për kontributin e tyre dhe përkrahjen e Akademisë. 

Para studentëve të vitit të parë akademik 2014/2015 një fjalë rasti ka mbajtur edhe dekani i Fakultetit të Sigurisë Publike, Nazmi Iballi. Ai tha se programi studimor i akredituar përmban në vete traditën e vlerave civilizuese evropiane në fushën e sigurisë.