Nevşehir, Kapadokia, Turqi  06 – 08 nëntor 2025 - Akademia e Kosovës për Siguri Publike (AKSP) po merr pjesë në Takimin e 14-të të Rrjetit Ndërkombëtar të Akademive Policore (INTERPA), i cili po zhvillohet në qytetin Nevşehir të rajonit të Kapadokias në Turqi, nga data 6 deri më 8 nëntor 2025.

Në këtë ngjarje të rëndësishme ndërkombëtare, AKSP përfaqësohet nga U.d. i Drejtorit të Përgjithshëm, z. Shpend Shabani, i shoqëruar nga z. Avni Istrefi, Udhëheqës i Divizionit për Marrëdhënie me Jashtë, dhe z. Emin Uka, Udhëheqës i Divizionit të Sigurimit të Cilësisë.

Takimi i 14-të i Rrjetit INTERPA është organizuar nën temën “Zhvillimi i strategjive për luftimin e krimeve kibernetike: Zbatimi i ligjit në epokën digjitale”, dhe bashkon 125 përfaqësues nga 41 shtete të ndryshme anëtare të këtij rrjeti ndërkombëtar.

Në ceremoninë hapëse morën pjesë personalitete të larta të institucioneve të sigurisë dhe akademive policore, përfshirë Presidentin e Akademisë Policore të Turqisë, Prof. Dr. Murat BALCI, zyrtarë të lartë të policisë turke, si dhe drejtues të akademive dhe qendrave të trajnimit nga vende të ndryshme të botës.

Gjatë konferencës, përveç seancave plenare dhe punimeve akademike, u mbajtën edhe takimet e Këshillit të Përgjithshëm dhe Bordit Ekzekutiv të INTERPA-s, ku u shqyrtuan tema të rëndësishme si:

• pranimi i anëtarëve të rinj në rrjet,

• zgjedhjet për organet udhëheqëse të INTERPA-s,

• planifikimi i aktiviteteve për vitet 2026–2027, përfshirë konferencat dhe punëtoritë ndërkombëtare që do të zhvillohen në Maqedoninë e Veriut, Indonezi, Katar dhe Vietnam.

Pjesëmarrja e Akademisë së Kosovës për Siguri Publike në këtë takim konfirmon angazhimin e vazhdueshëm të AKSP-së për bashkëpunim ndërkombëtar, shkëmbim të praktikave më të mira dhe forcim të kapaciteteve profesionale në fushën e arsimit policor dhe sigurisë publike.

Zagreb, Kroaci, 29 tetor - Me ftesë të Akademisë së Policisë së Kroacisë “Polici i Parë Kroat”, përfaqësuesit e Akademisë së Kosovës për Siguri Publike (AKSP), z.Shpend Shabani, Ushtrues detyre i Drejtorit të Përgjithshëm, dhe z.Avni Istrefi, Udhëheqës i Divizionit për Marrëdhënie me Jashtë, së bashku me përfaqësues nga Policia e Kosovës morën pjesë në takimin e udhëheqësve të Institucioneve të arsimit policor dhe përfaqësuesve të policisë kufitare në kuadër të projektit “Përpjekje e përbashkët për ndërtimin e kapaciteteve: Mbikëqyrja e kufijve duke respektuar të drejtat e njeriut  (“Common effort on capacity building: Border surveillance with respect to human rights”), që u mbajt më 28-29 tetor 2025 në Zagreb, Kroaci.

Ngjarja u organizua nga Akademia e Policisë e Kroacisë “Polici i parë kroat”, në bashkëpunim me Akademinë Federale të Policisë së Lübeck, Gjermani, dhe mblodhi përfaqësues nga institucione të arsimit policor dhe të policisë kufitare nga Kosova, Bosnja dhe Hercegovina, Mali i Zi, Maqedonia e Veriut dhe Polonia.  

Gjatë takimit, fokusi kryesor ishte vlerësimi i ndikimit të trajnimeve të zhvilluara në kuadër të projektit në shpërndarjen e njohurive dhe përvojave të pjesëmarrësve tek kolegët e tyre në vendet përkatëse, si dhe shkëmbimi i ideve për fusha të reja bashkëpunimi, përfshirë trajnime në zbulimin e mashtrimeve me dokumente dhe zhvillimin e kapaciteteve në arsimin e të rriturve.

Në kuadër të pjesëmarrjes në këtë ngjarje, përfaqësuesit e AKSP-së zhvilluan takime me delegacionet pjesëmarrëse, me fokus në inicimin dhe forcimin e bashkëpunimit bilateral në fushën e arsimit policor dhe zhvillimit profesional. Gjatë këtyre takimeve, AKSP prezantoi ide dhe mundësi për bashkëpunime të mëtejshme, duke theksuar rëndësinë e vazhdimësisë së projekteve të përbashkëta dhe shkëmbimit të përvojave ndërmjet institucioneve të arsimit policor në rajon dhe Evropë.

Në përmbyllje të takimit, u theksua se kontributi i përbashkët i të gjitha palëve pjesëmarrëse riafirmon se përmes bashkëpunimit dhe përpjekjeve të përbashkëta mund të ndërtohen kufij më të sigurt, duke respektuar njëkohësisht të drejtat themelore të njeriut.

Shkup, 16 tetor 2025 - Të martën në Shkup u themelua Asociacioni Rajonal i Akademive Policore/Qendrave të Trajnimeve të Evropës Juglindore (RAPATC SEE), ku morën pjesë përfaqësuesit e Kosovës, Shqipërisë, Kroacisë, Greqisë, Maqedonisë së Veriut, Malit të Zi, Sllovenisë dhe Moldavisë.

Deklaratën e Përbashkët të themelimit të Asociacionit Rajonal të Akademive Policore të Evropës Juglindore, në emër Akademisë së Kosovës për Siguri Publike, e nëshkruajti Ushtruesi i Detyrës së Drejtorit të Përgjithshëm, z. Shpend Shabani i cili ka marrë pjesë në konferencë i shoqëruar nga Drejtori i Departamentit të Financave dhe Shërbimeve të Përgjithshme z.Rrahim Rexha.

Konferenca themeluese e Asociacionit, është organizuar nga Ministria e Punëve të Brendshme e Maqedonisë së Veiut e përkrahur nga OSBE-ja dhe Projekti “Mbështetja e BE-së për Forcimin e Luftës Kundër Kontrabandës dhe Trafikimit të Migrantëve me Qenie Njerëzore.

Pjesëmarrësit e Konferencës vlërsuan se themelimi i Asociacionit RAPAC SEE, shënon një hap të rëndësishëm drejt bashkëpunimit rajonal në fushën e arsimit dhe trajnimit policor, me qëllim forcimin e profesionalizmit dhe sigurisë publike në rajon.

Gjatë Konferencës themeluese që zgjati tri ditë, pjesëmarrësit trajtuan në detaje parimet udhëheqëse, objektivat dhe detyrat e Asociacionit, i cili synon të thellojë bashkëpunimin rajonal në fushën e trajnimeve dhe arsimit për zyrtarët e institucioneve të zbatimit të ligjit. U theksua rëndësia e bashkërendimit të përpjekjeve për të harmonizuar kurrikulat e trajnimit, për të zhvilluar programe të përbashkëta trajnuese dhe për të inkurajuar kërkimin shkencor dhe zhvillimin profesional. Gjithashtu, u nënvizua rëndësia e mbështetjes së programeve të shkëmbimit të instruktorëve dhe praktikantëve, me qëllim zgjerimin e perspektivave dhe përmirësimin e aftësive përmes përvojës së përbashkët ndërkombëtare.