NewsArticle

Vushtrri, 15 gusht 2017 - Akademinë e Kosovës për Siguri Publike (AKSP),sot e vizitoi një delegacion nga nga Policia e Republikës së Turqisë  të udhëhequr nga  Barish Uyansoy Drejtor i Departamentit për trajnime dhe menaxhim.

Po ashtu delegacioni ishte i shoqëruar edhe nga shefi I zyrës së TIKA-s në Prishtinë Hasan Burak si dhe zv/shefi  i zyrës së TIKA-së znj. Fulya Aslan.

Drejtori Smakiqi gjatë këtij takimi e informoi delegacionin  për procese të rëndësishme të Akademisë, për hapjen e Fakultetit të Sigurisë, projektin e binjakëzimit  IPA II-  të financuar nga Bashkimi Evropian, bashkëpunimin ndërkombëtarë  e në veçanti  foli për  bashkëpunimin me Policinë e Republikës së Turqisë  ku kanë dhënë një kontribut të jashtëzakonshëm  në trajnimin e pjesëtarëve  të  Policisë së Kosovës.

Me këtë rast drejtori Smakiqi ka falënderuar delegacionin  nga Turqia  për ndihmën e pakursyer që po japin Akademisë  në ngritjen profesionale të pjesëtarëve të sigurisë, për bashkëpunimin e shkëlqyeshëm, si dhe për gatishmërinë e tyre për t'i ofruar ndihmë Akademisë edhe në të ardhmen.

Delegacioni nga Policia e Republikës së Turqisë  e inkurajuan drejtorin Smakiqi për të arriturat, po ashtu ata shprehen gatishmërinë e tyre për bashkëpunim dhe përkrahje edhe në të ardhmen.

Në fund delegacioni së bashku me menaxhmentin e Akademisë vizituan objektet përcjellëse, ku përmes prezantimeve nga instruktorët u informuan lidhur me pjesën praktike ku pjesëtaret e sigurisë publike zhvillojnë trajnimet. 

Vushtrri, 22 gusht 2017 -  E nderuara familja Rexhepi,
Me pikëllim të thellë pranuam lajmin për ndarjen nga jeta të Ish-kryeministrit të Republikës së Kosovës dhe ish ministrit të  Punëve të Brendshme  Dr. Bajram Rexhepi.

Doktor Bajrami gjatë gjithë jetës i shërbeu atdheut dhe qytetarëve të saj. Doktor Bajrami para së gjithash në kujtesën e qytetarëve do të mbetet mjek i devotshëm dhe veprimtar i paepur i çështjes kombëtare.

Doktor Bajrami ishte kryeministri i parë i  Qeverisë së Kosovës së lirë, duke vënë themelet e shtet ndërtimit, kurse në cilësinë e ministrit të Ministrisë së Punëve të Brendshme përveç tjerash kontribuoi në themelimin dhe zhvillimin e Institucioneve të Sigurisë Publike.

Akademia e Kosovës për Siguri Publike përjetësisht do të  jetë mirënjohëse ministrit Rexhepi i cili  gjatë mandatit të tij vuri themelet e  Akademisë moderne për trajnimin dhe arsimimin e lartë  për zbatuesit e ligjit në Republikën e  Kosovës.

E nderuara familja Rexhepi.

Në emër të Akademisë së Kosovës për Siguri Publike dhe në emrin tim pranoni ngushëllimet më të sinqerta, për shkuarjen nga kjo jetë të Doktor Bajramit.

Me respekt
Ismail Smakiqi
Drejtor i Përgjithshëm i Akademisë së Kosovës për Siguri Publike